តើមានផ្លូវកាត់ទៅកាន់ភាពជោគជ័យដែរឬទេ? ល្ខោននិយាយ «បុគ្គលជោគជ័យ» នឹងលើកយកជ្រុងមួយនៃទិដ្ឋភាពសង្គមខ្មែរ ការដែលមនុស្សមួយចំនួនឆាប់ជឿសម្តីបញ្ចុះបញ្ចូល អំពីយុទ្ធសាស្ត្រជោគជ័យ ឆ្ពោះទៅកាន់ភាពមានបានក្នុងមួយពព្រិចភ្នែក។
ដោយ បូរិន សុភាវុទ្ធតី
ពាក្យថា «បុគ្គលជោគជ័យ» ឬ «គ្រូជោគជ័យ» បានក្លាយជាពាក្យដ៏ល្បីមួយនៅកម្ពុជា ជាពិសេសក្នុងចំណោមអ្នកប្រើប្រាស់បណ្ដាញសង្គមហ្វេសប៊ុក ជាយុវជននៅកម្ពុជា។ ពាក្យនេះត្រូវបានប្រើជារឿយៗ ជាការនិយាយលេងដើម្បីកំសាន្តអារម្មណ៍។
មុនពេលមានទំនោរនៃការប្រើប្រាស់ពាក្យថា «បុគ្គលជោគជ័យ» ជារឿងអស់សំណើច ពាក្យនេះដើមឡើយ ប្រើក្នុងន័យវិជ្ជមាន ដែលជានិច្ចកាលយើងប្រើប្រាស់ សម្រាប់សំដៅលើបុគ្គលណា ដែលខិតខំតស៊ូពុះពារជម្នះរាល់ឧបសគ្គក្នុងជីវិត ដើម្បីឈានដល់ភាពជោគជ័យក្នុងអាជីពការងារ ឬអាជីវកម្មរបស់ខ្លួន។ បុគ្គលជោគជ័យនោះ មានកិត្តិយស នឹងត្រូវបានអ្នកផងគោរពនៅក្នុងសង្គម ហើយពួកគាត់មានបទពិសោធន៍ជីវិតល្អៗ ដើម្បីចែករំលែកដល់យុវជនជំនាន់ក្រោយ។
នៅកម្ពុជា ក្នុងរយៈពេលថ្មីៗនេះ យើងសង្កេតឃើញមានការផ្លាស់ប្តូរវិជ្ជមានជាច្រើនក្នុងវិស័យផ្សេងៗ។ មួយក្នុងចំណោមនោះ គឺការរីកសុះសាយនៃសហគ្រិនភាពនៅកម្ពុជា ដែលនាំឲ្យមានសហគ្រិនវ័យក្មេងជាច្រើនរូប និង ការបង្កើតឲ្យមានធុរៈកិច្ចថ្មីៗជាច្រើន ដើម្បីចូលរួមដោះស្រាយបញ្ហាសង្គម ដោយការប្រើប្រាស់គំនិតច្នៃប្រឌិត បូកផ្សំនឹងការប្រើប្រាស់ជំនួយពីបច្ចេកវិទ្យាទំនើប។
បើយើងក្រឡេកមើលជ្រុងមួយទៀតនៃសង្គមកម្ពុជា ករណីឆបោកនិងសន្យាខ្យល់ បោកបញ្ឆោតក្នុងរូបភាពជាសិក្ខាសិលា ដើម្បីក្លាយជាមនុស្សជោគជ័យ ក៏ដូចជាការយកលុយមកវិនិយោគលើការរកសុី ជាមួយនឹងការធានាថានឹងបានប្រាក់កម្រៃចំណេញមកវិញទ្វេដង បាននឹងកំពុងកើនឡើងជារឿយៗ ហើយកាន់តែធ្ងន់ធ្ងរទៅៗ។
យុទ្ធសាស្ត្រលើកយកប្រាក់ចំណេញដាក់មុខ និងជោគជ័យលឿននេះ ធ្វើឲ្យមនុស្សជឿស្លុង ហើយគិតខ្លី ដោយមិនបានសិក្សាឈ្វេងយល់ឲ្យសុីជម្រៅ ពីសាវតានៃបុគ្គលនោះឲ្យលើសពីអាវធំរបស់អ្នកបញ្ចុះបញ្ចូល និងរបៀបឬដំណាក់កាលនៃការវិនិយោគឲ្យបានជាក់លាក់។
ដើម្បីដាស់តឿនស្មារតីប្រជាជនខ្មែរមួយចំនួនអំពីបញ្ហានេះ ល្ខោននិយាយមួយក្រោមចំណងជើងថា៖ «បុគ្គលជោគជ័យ» គ្រោងនឹងសម្តែងសាកល្បង នៅថ្ងៃទី១២ខាងមុខនេះ នៅបរិវេណសាលាមធ្យមវិចិត្រសិល្បៈ ដែលសំបុត្រសម្រាប់ការចូលទស្សនាមានតម្លៃ ២ដុល្លារ។ ហើយ ការសម្តែងពេញនឹងធ្វើឡើងនៅថ្ងៃទី១៣ ខែកុម្ភៈ វេលាម៉ោង ៦៖៣០នាទីល្ងាច នៅមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ជាមួយនឹងតម្លៃសំបុត្រចូលទស្សនា ៤ដុល្លារ។ ការសម្តែងនេះ ជាផ្នែកមួយនៃកម្មវិធី«រដូវវប្បធម៌»ប្រចាំឆ្នាំរបស់អង្គការសិល្បៈខ្មែរអមតៈ។
«បុគ្គលជោគជ័យ» នឹងបង្ហាញពីជីវិតរបស់គ្រូបង្រៀនមត្តេយ្យម្នាក់ឈ្មោះ រីតា ដែលមានក្តីស្រមៃចង់ក្លាយជាអ្នករកសុីជោគជ័យម្នាក់។ ដើម្បីធ្វើឲ្យក្តីស្រមៃរបស់ខ្លួនក្លាយជាការពិត រីតាចាប់ផ្ដើមទៅប្រឹក្សាជាមួយគ្រូជោគជ័យម្នាក់។ គ្រូជោគជ័យម្នាក់នោះ បានបញ្ចុះបញ្ចូលនាងឱ្យវិនិយោគ ២មុឺនដុល្លារ ក្នុងការបណ្ដាក់ទុនរកស៊ីជាមួយគាត់។ ដោយមិនចង់មានរឿងជាមួយគ្រួសារ រីតាមិនបានប្រាប់ស្វាមីរបស់ខ្លួនគ្រប់យ៉ាងនោះទេ ដែលធ្វើឲ្យគាត់គិតថានាងដាក់ទុនជាមួយមិត្តភក្តិ។ បន្ទាប់មក ការបណ្ដាក់ទុនរកស៊ីក៏មានបញ្ហាកើតឡើងជាបន្តបន្ទាប់។
ល្ខោននិយាយ «បុគ្គលជោគជ័យ» និពន្ធឡើងដោយលោកសួស យ៉ាមី ដែលសាច់រឿងនេះ ត្រូវបានសរសេរទៅដល់ក្រុមគោលដៅ ជាយុវជន សហគ្រិន និងអ្នកដែលមានគំនិតចង់បង្កើតអាជីវកម្ម ប៉ុន្តែសាធារណៈជនទូទៅ សុទ្ធតែអាចទស្សនាបាន ដើម្បីទុកជាករណីសិក្សាសម្រាប់ជីវិត។
លោកយ៉ាមីបានពន្យល់ថា៖ ល្ខោននិយាយ «បុគ្គលជោគជ័យ» ជាផ្នែកមួយដែលមានសារៈសំខាន់ចំពោះសង្គមកម្ពុជា និងយុវជនកម្ពុជានាពេលបច្ចុប្បន្ន និងទៅថ្ងៃអនាគត។ រឿងនេះ ជាសារដាស់តឿន និងពញ្ញាក់ស្មារតីពួកគាត់ មុននឹងធ្វើការសម្រេចចិត្ត ត្រូវមានការពិភាក្សាជាមួយអ្នកណា ឬជាមួយអ្នកជុំវិញខ្លួនឱ្យបានច្បាស់ ជាជាងការសោកស្ដាយ ឬមានវិប្បដិសារីទៅថ្ងៃក្រោយ។»
លោកយ៉ាមី និពន្ធរឿងនេះឡើងក្នុងឆ្នាំ២០២១ នៅក្នុងសិក្ខាសាលាស្តីពី «មូលដ្ឋានគ្រឹះនៃការសរសេរ និងអភិវឌ្ឍអត្ថបទល្ខោន» របស់អង្គការសិល្បៈខ្មែរអមតៈ សហការជាមួយអ្នកនិពន្ធ និងអ្នកដឹកនាំល្ខោនល្បីឈ្មោះម្នាក់ គឺលោកភូ ហ្សង់-បាទីស្ត៍ (Jean-Baptiste PHOU)។ ហើយស្នាដៃរបស់លោកយ៉ាមី គឺជារឿងតែមួយគត់ក្នុងចំណោមសាច់រឿងទាំងអស់១០ នៃសិក្ខាសាលាខាងលើដែលត្រូវបានជ្រើសរើស ដើម្បីអភិវឌ្ឍទៅជាការសម្តែងក្នុងទម្រង់ល្ខោននិយាយ។
ក្នុងវ័យ២៨ឆ្នាំ លោកយ៉ាមី បានចាប់អារម្មណ៍ចូលរួមក្នុងសិក្ខាសាលាខាងលើ ព្រោះលោកចង់ទទួលបានចំណេះដឹងបន្ថែមទាក់ទងនឹងផ្នែកសរសេរពីអ្នកជំនាញ ដើម្បីអភិវឌ្ឍអាជីពជាអ្នកនិពន្ធអត្ថបទសារព័ត៌មានរបស់លោក និង ការចង់ចូលរួមជាប្រយោជន៍រួមក្នុងសង្គម តាមរយៈស្នាដៃរបស់ខ្លួន។
«ល្ខោននិយាយគឺជាការសម្តែងមួយទម្រង់ ដែលប្រកបដោយការដាក់មនោសញ្ចេតនា ការប្រើប្រាស់ពាក្យពេចន៍ និងទឹកមុខបានយ៉ាងល្អ អ្នកទស្សនានឹងមានអារម្មណ៍ដូចជាខ្លួនកំពុងទស្សនាជីវិតពិតៗ ដែលវានឹងអូសទាញអ្នកទស្សនាឲ្យចង់តាមដាន ថាតើនឹងមានរឿងរ៉ាវអ្វីកើតឡើងបន្តទៀតក្នុងការសម្តែង»។
លោកយ៉ាមី បានប្រាប់ Focus ថាកត្តាដែលញុំាងចិត្តធ្វើឱ្យលោកសរសេរល្ខោននិយាយនេះឡើង ដោយសារតែបទពិសោធន៍ផ្ទាល់ខ្លួនកាលលោករៀនថ្នាក់វិទ្យាល័យ នៅចន្លោះឆ្នាំ ២០១១ - ២០១២ គីការដែលចាស់ៗ សិស្សានុសិស្ស និងយុវជនដូចគ្នា ចាញ់បោកបុគ្គលជោគជ័យក្លែងក្លាយ ឲ្យចូលរួមវគ្គជោគជ័យ ទិញផលិតផល លក់ដីឡូតិ៍ ឬដាក់ប្រាក់វិនិយោគ ដែលដូចគ្នានឹងទិដ្ឋភាពសង្គមកម្ពុជា នាពេលបច្ចុប្បន្នដែរ។
«កត្តាសំខាន់បំផុត ដែលដិតដាមក្នុងចិត្តខ្ញុំខ្លាំង គឺប៉ុន្មានឆ្នាំចុងក្រោយនេះ ប្រទេសកម្ពុជា ចាប់ផ្តើមរីកចម្រើន ប្រជាជនចាប់ផ្តើមធ្លាក់ចូលក្នុងសង្គមសម្ភារៈនិយម មនុស្សចាប់ផ្តើមគិតចង់មានចង់បានឆាប់ៗ។»
លោកបានបន្ថែមថា ដោយសារតែកត្តាទាំងនេះហើយ ទើបធ្វើឱ្យក្រុមឱកាសនិយម ធ្វើបច្ចុប្បន្នភាពល្បិច ដោយយក soft skill ឬជំនាញទន់ ជាចំណុចទាក់ទាញមកបង្រៀនដើម្បីបាំងមុខ ជាផ្លូវសម្រាប់អូសទាញមនុស្ស ដែលចង់ជោគជ័យលឿនហួសសមត្ថភាព។
លោកយ៉ាមីសប្បាយចិត្តនៅពេលដែលសាច់រឿងរបស់ខ្លួន នឹងសម្តែងឲ្យមហាជនបានឃើញក្នុងពេលឆាប់ៗនេះ។ ល្ខោននិយាយ«បុគ្គលជោគជ័យ» ដឹកនាំសម្តែងដោយលោកណេន ភារិទ្ធ ដែលជាអតីតនិស្សិតបញ្ចប់
ថ្នាក់បរិញ្ញាបត្រ ផ្នែកដឹកនាំជំនាញល្ខោននិយាយនៅមហាវិទ្យាល័យសិល្បៈនាដសាស្ត្រ នៃសកលវិទ្យាល័យភូមិន្ទវិចិត្រសិល្បៈ ព្រមទាំងសម្ដែងដោយសិល្បករដែលមានទេព្យកោសល្យ អមដោយការរចនាឆាក ប្រព័ន្ធភ្លើង និងសម្លេង ដើម្បីលើកកម្ពស់គុណភាពនៃការសម្តែងថែមមួយកម្រិតទៀត៕
Comments
Post a Comment