«យុវជន និងសម្ពាធផ្លូវចិត្តក្នុងយុគសម័យឌីជីថល»
ការស្គាល់ច្បាស់ពីតម្លៃនៃដំណើរជីវិតខុសៗគ្នារបស់មនុស្សម្នាក់ៗ និងយកចិត្តទុកដាក់ពីសុខភាពផ្លូវកាយ និងផ្លូវចិត្ត ជាគន្លឹះសំខាន់ក្នុងរស់នៅដោយមានន័យ និងភាពរីករាយ ។
សម្ពាធផ្លូវចិត្ត ជាបញ្ហាប្រឈមមួយនៅក្នុងវាលវដ្តសង្សា ដែលមនុស្សគ្រប់រូបមិនអាចជៀសផុត។ ជាពិសេសលើយុវវ័យ ដែលស្ថិតក្នុងដំណាក់កាលមួយនៃជីវិត ដែលមានការផ្លាស់ប្ដូរច្រើន ទាំងផ្នែករូបរាងកាយ ប្រាជ្ញា និងស្មារតី។ ការផ្លាស់ប្ដូរទាំងនេះ ធ្វើឱ្យយុវជនងាយប្រឈមនឹង សម្ពាធជាច្រើននៅក្នុងការសិក្សា ឬ ការងារ រួមទាំងសម្ពាធពីក្រុមគ្រួសារ មិត្តភ័ក្ដិ និងសង្គម។
តាមរយៈស្ថានភាពជាក់ស្តែងនៅក្នុងសង្គមនេះ កម្មវិធីរដូវវប្បធម៌ក្នុងឆ្នាំ២០២២ បានធ្វើការឆ្លុះបញ្ច្ចាំងពីលំនាំបញ្ហាមួយ តាមរយៈល្ខោននិយាយ «ផ្ទះកសិដ្ឋានធម្មជាតិ» ដែលលើកឡើងនូវបញ្ហាពិតៗ និងសម្ពាធផ្លូវចិត្ត ដែលយុវវ័យច្រើនជួបប្រទះដោយមិនដឹងខ្លួន នៅក្នុងសម័យឌីជីថល។
សម្ពាធផ្លូវចិត្ត អាចកើតឡើងពីកត្តាជាច្រើន។ ជាពិសេស ទម្លាប់នៃការប្រៀបធៀបខ្លួនជាមួយអ្នកដទៃ និង ការបរាជ័យជាឬសគល់នៃបញ្ហាដែលធ្វើឱ្យមនុស្សងាយបាក់ទឹកចិត្ត។ បុគ្គលដែលមានវិបត្តិនេះ ទទួលបានអារម្មណ៍នៃឥទ្ធិពល អវិជ្ជមាននៅជុំវិញខ្លួន ហើយមានភាពអសកម្មក្នុងការបំពេញមុខងារប្រចាំថ្ងៃ និងការបាត់បង់ចំណាប់អារម្មណ៍ចំពោះការចូលរួមសកម្មភាពផ្សេងៗ។
បូកផ្សំនឹងការរីកចម្រើននៃបច្ចេកវិទ្យា បានជំរុញឱ្យយុវវ័យចំណាយពេលវេលាជាច្រើនរបស់ពួកគេ លើបណ្ដាញសង្គម។ ប្រសិនបើយើងសង្កេតមើលជាក់ស្ដែង បណ្តាញសង្គមប្រៀបបានដូចជា ឧបករណ៍មួយ សម្រាប់មនុស្សប្រើប្រាស់ក្នុងការទំនាក់ទំនង ប៉ុន្តែវាជាអាវុធមុខពីរដែលអាចផ្តល់ ទាំងផលល្អ និងផលអាក្រក់។ ហើយវាអាស្រ័យលើបុគ្គលម្នាក់ៗ ក្នុងការប្រើប្រាស់បណ្តាញ ទាំងនោះឱ្យបានត្រឹមត្រូវ។
ជាហេតុក្នុងសម័យឌីជីថលនេះ យុវជនកម្ពុជាភាគច្រើនកំពុងប្រឈមនឹងវិបត្តិផ្លូវចិត្ត ដោយសារក្ដីបារម្ភចម្បងជុំវិញ បញ្ហាមួយចំនួនរួមមាន បញ្ហាការងារ និងជាពិសេស ការប្រៀបធៀបខ្លួនឯងជាមួយអ្នកដទៃ និងតួអង្គនៅក្នុងបណ្តាញសង្គម។
ក្នុងវ័យដែលពោរពេញដោយសម្ពាធជុំវិញខ្លួន យុវជនមិនតិចទេ ដែលខំប្រឹងប្រែងធ្វើការដើម្បីឡើងតំណែង ឡើងប្រាក់ខែ និងប្រើប្រាស់បណ្តាញសង្គមដើម្បីបង្អួតសម្ភារៈនិយមប្រើប្រាស់ថ្លៃៗ ជីវិតហ៊ឺហារ និងជោគជ័យក្នុងជីវិតការងារ។ ការខំប្រឹងប្រែងទាំងភ្លេចខ្លួន និងទម្លាប់នៃការប្រៀបធៀបខ្លួន ឯងជាមួយអ្នកដទៃ អាចក្លាយជាជំងឺតាមព្យាបាទ នៅក្នុងជីវិតរបស់មនុស្ស ដោយធ្វើឱ្យពួកគេមិនអាចស្វែងរកតម្លៃពិតសម្រាប់ជីវិតរបស់ខ្លួន និងរស់នៅដោយក្តីរីករាយ។ មនុស្សប្រៀបធៀបខ្លួនឯងទៅនឹងអ្នកដទៃលើបណ្ដាញសង្គម ហើយជារឿយៗនាំឱ្យមានការអារម្មណ៍អវិជ្ជមាន និងភាពតានតឹងលើខ្លួនឯង។
ការចំណាយពេលច្រើនមើលជីវិតអ្នកដទៃ ហើយធ្លាក់ចូលទៅក្នុងរណ្តៅនៃបណ្ដាញសង្គម អាចធ្វើឱ្យមនុស្ស មិនអាចមើលឃើញច្បាស់ពីតម្លៃនៃទំនាក់ទំនងទៅកាន់សង្គមខាងក្រៅពិត។ ពេលខ្លះ ការផ្ញើសារសួរសុខទុក្ខ និងចំនួនបញ្ចេញមតិលើរូបនៅបណ្តាញសង្គម មិនមែនដែលជាមិត្តយល់ចិត្តបំផុត ដែលអាចចែករំលែករឿងរ៉ាវក្នុងចិត្ត និងជួយបន្ធូរសម្ពាធផ្លូវចិត្តបាននោះទេ។
ការគ្រប់គ្រងខ្លួនឯង ក្នុងការប្រើប្រាស់បណ្តាញសង្គមដោយភាពឈ្លាសវៃ និងការរក្សាទំនាក់ទំនងមិត្តភក្កិល្អៗ អាចជួយកាត់បន្ថយការតានតឹង និងសម្ពាធផ្លូវចិត្ត នៅពេលដែលអ្នកមានបញ្ហា។ ការលោភលន់ចង់បានលុយកាក់ ទ្រព្យសម្បត្តិ សម្ភារៈមានតម្លៃ អំណាច ភាពល្បីល្បាញ សម្រស់និងយុវវ័យ ដែលខុសពីធម្មជាតិ និងសមត្ថភាពខ្លួន គឺជាសេចក្តីសុខបណ្តោះអាសន្នតែប៉ុណ្ណោះ។
ដោយឡែក ការផ្សារភ្ជាប់ទំនាក់ទំនងរវាងមនុស្សនិងមនុស្ស គឺជាការផ្លាស់ប្ដូរថាមពលរវាងខ្លួនយើង និងអ្នកដទៃដោយផ្ទាល់ កាលណាបុគ្គលទាំងសងខាងបានទទួលថាមពលនោះ ហើយមានអារម្មណ៍ថា ទទួលបានសេចក្ដីស្រឡាញ់ ការយល់ចិត្ត ការស្ដាប់ និងមានពេលវេលាសម្រាប់គ្នាទៅវិញទៅមក។ ពេលវេលានោះនឹងជម្រុញឱ្យមានការផ្លាស់ប្ដូរ និងទំនុកចិត្តរវាងគ្នានឹងគ្នា។
ជាធម្មតា រឿងខ្លះមិនអាចដេកគិតដោះស្រាយដោយខ្លួនឯងបានឡើយ។ នៅពេលដែលអ្នកមានបញ្ហាមិនអាចដោះស្រាយបាន អ្នកមិនគួរសំងំអោបទុក្ខព្រួយតែម្នាក់ឯងនោះទេ ព្រោះវាអាចនាំឱ្យអ្នកធ្លាក់ក្នុងវិបត្តិផ្លូវចិត្តបានយ៉ាងលឿន។ ប្រសិនបើមាននរណាម្នាក់ ដែលអាចផ្សារភ្ជាប់ទំនាក់ទំនងពិតប្រាកដ វាអាចជួយដកសម្ពាធដែលមាននៅក្នុងចិត្តឱ្យធូរស្រាលជាងមុន អារម្មណ៍ស្រឡាញ់ និងទំនាក់ទនងនេះ គឺជាសេចក្ដីត្រូវការរបស់មនុស្សគ្រប់គ្នា។
Comments
Post a Comment